Minisitiri w’Ubuzima muri Côte d’Ivoire, Pierre N’Gou Dimba yatangaje ko nyuma y’imyaka 25 nta Ebola irangwa muri iki gihugu, habonetse umukobwa w’imyaka 18 uyifite, wari uherutse mu gihugu cya Guinea.
Akimara kuboneka, yahise ajyanwa mu bitaro byihariye mu mujyi wa Abidjan kuvuruirwayo.
Umuryango Mpuzamahanga wita ku Buzima (OMS) watangaje ko uwo mukobwa yinjiye muri Côte d’Ivoire tariki 12 Kanama ari nabwo yahise afatwa ibizamini.
Igihugu cya Guinea uwo mukobwa yari avuyemo, kiri mu byo mu burengerazuba bwa Afurika byibasiwe na Ebola hagati ya 2014 na 2016. Mu mezi ane ashize kandi Ebola yari yongeye kuvugwa muri iki gihugu kugeza muri Kamena ubwo OMS yatangazaga ko itakiharangwa.
NIYONZIMA Theogene
